Аляксандр Кільчэўскі расказаў прадстаўнікам СМІ пра даследаванні па стварэнні трансгенных раслін і жывёл, якія праводзяцца ў Рэспубліцы Беларусь. Пры Інстытуце генетыкі і цыталогіі НАН функцыянуе палігон для выпрабаванняў трансгенных раслін. Найбольшую цікавасць для навукоўцаў уяўляюць даследаванні па ўстойлівасці бульбы да каларадскага жука і іншых насякомых. У гэтым кірунку беларускія вучоныя дабіліся пэўных вынікаў у выглядзе зыходнага сартавога матэрыялу, які можа стаць асновай для новага больш ўстойлівага да шкоднікаў гатунку. Акрамя таго, беларускія вучоныя працуюць з рапсам, для павышэння ўстойлівасці да гербіцыдаў. Батанічны сад вывучае трансгенныя канюшыну і журавіны, працуе з мадэльнымі раслінамі.
Руслан Шайко расказаў пра пагалоўе трансгенных коз (каля 500), малако якіх багата лактаферынам. Зараз стаіць пытанне аб яго рэалізацыі. Акрамя таго дырэктар Інстытута генетыкі і цыталогіі расказаў аб працы Нацыянальнага каардынацыйнага цэнтра біябяспекі, які функцыянуе пры інстытуце. Яго асноўныя функцыі – праца з міністэрствамі, ведамствамі, інфармаванне насельніцтва, правядзенне экспертных ацэнак.
Таксама вучоныя расказалі пра кантроль за ГМА ў прадуктах і кармах для жывёл у Беларусі. За гэтым сёння сочаць 17 лабараторый, штогод каля 1000 узораў праходзяць адпаведную праверку. Выпадкі перавышэння дапушчальнага ўзроўню (больш за 0,9%), па словах вучоных, адзінкавыя.