Для аматараў навукова-папулярных лекцый будзе прапанавана дзве лекцыйныя пляцоўкі з тэматычнымі блокамі адукацыйных праектаў “15х4”, “TEDxYOUTH”, “Навука па-за сабой”, “Масаракш”, якія ўжо добра вядомы мінчанам.
У касмічнай зоне акрамя лекцый будуць прадстаўлены майстар-класы ад Мінскага планетарыя, выстава фота і дэманстрацыя стартапа “Айкумена”, які дазваляе адчуць сябе касмічным падарожнікам. Адметнасцю гэтай зоны стане сустрэча з сапраўднымі касманаўтамі.
У рамках Робазоны будуць прадстаўлены “Аб’яднаны інстытут праблем інфарматыкі” і школы робататэхнікі “Стэмлаб”, “Адукацыйны цэнтр Парка высокіх тэхналогій” і “Школа лічбавых тэхналогій” з экспанатамі і майстар-класамі, дзе можна будзе вырабіць робатаў і некаторых нават забраць з сабой. Таксама ў Робазоне адбудуцца спаборніцтвы па Міні-сумо і яздзе па лініі сярод робатаў.
Нікога не пакіне абыякавым Забаўляльная зона, тут будуць праводзіць навуковае шоу, майстар-класы і паказваць экспанаты мінскія музеі навукі: “Эксперыментус”, “Элемента”, “Квантум”, адукацыйны праект “Разумны Мінск” і Факультэт фізікі БДУ.
У зоне Археалогіі кожны зможа паспрабаваць сябе ў ролі археолага, для гэтага ў ёй будуць арганізаваны некалькі палігонаў для раскопак, а таксама выстава археалагічных артэфактаў.
Спецыяльным госцем Фестывалю навукі будзе Усерасійскі Фестываль навукі NAUKA 0+, які прадставіць купальны кінатэатр з праграмай фільмаў аб навуцы і космасе, а таксама экспазіцыю Сунгір, прысвечаную адной з самых старажытных стаянак чалавека, з дэманстрацыяй фільмаў у віртуальнай рэальнасці і рэканструкцыяй старажытнага жылля. Таксама NAUKA 0+ прывязе з сабой робатаў праекта “Бал робатаў” для дэманстрацыі ў Робазоне.
Свае зоны з насычанай праграмай прадставяць “Інфармацыйны цэнтр па атамнай энергіі”, “Цэнтральная навуковая бібліятэка” і “Беларуская сельскагаспадарчая бібліятэка”, таксама на Фестывалі запланавана Дзіцячая зона ад праекта “Маленькая тусоўка”, відовішчная Выстава распрацовак Нацыянальнай акадэміі навук Беларусі, тэст-драйв электратранспарту ад завода “Оптрон” і Мабільны музей акіяна.
Час работы “Фестывалю навукі” з 12:00 да 20:00, для таго каб трапіць на мерапрыемства неабходна набыць квіток у Батанічны сад, які каштуе: - поўны - 7 рублёў - ільготны - 4 рублі (школьнікі, студэнты дзённай формы навучання і пенсіянеры) - дзіцячы - 2 рублі (дзеці 2 - 6 гадоў)
Квіткі даступныя загадзя анлайн на сайце bezkassira.by
