Міжнародная школа маладых археолагаў сабрала прадстаўнікоў акадэмічнай і ўніверсітэцкай навукі з Азербайджана, Арменіі, Беларусі, Казахстана, Кыргызстана, Малдовы, Расіі, Таджыкістана і Украіны.
У склад дэлегацыі Інстытута гісторыі НАН Беларусі пад кіраўніцтвам намесніка дырэктара па навуковай рабоце Вадзіма Лакізы ўвайшлі маладыя вучоныя-археолагі, навуковыя супрацоўнікі Анастасія Касцюкевіч, Павел Кенька, Марыя Ткачова і Станіслаў Юрэцкі.
Прадстаўнікі Інстытута гісторыі НАН Беларусі расказалі калегам аб сваіх напрацоўках па перыядзе неаліту і ранняга сярэднявечча Беларусі, распаўсюджанні прывазных прадметаў на тэрыторыі Полацкай зямлі, пра палявыя працы маладых археолагаў. Далёка за межамі Беларусі сталі вядомыя прарыўныя археалагічныя даследаванні помнікаў Васілеўшчына і Кардон, што ўвайшлі ў ТОП-10 вынікаў фундаментальных даследаванняў НАН Беларусі ў 2015 і 2016 гг. Асаблівую цікавасць выклікаў даклад Вадзіма Лакізы, які быў прысвечаны сучаснаму стану айчыннай археалогіі, а таксама пытанням, што тычацца аховы гісторыка-культурнай і археалагічнай спадчыны. У выніку абмеркавання былі выяўлены агульныя для краін СНД праблемы па захаванні помнікаў і барацьбе з “чорнымі капальнікамі”. Вучоны анансаваў заяўку Інстытута гісторыі на правядзенне такой школы ў Беларусі, у тым ліку і на тэрыторыі Белавежскай пушчы, уключанай у спіс сусветнай спадчыны ЮНЕСКА.
Важным вынікам удзелу ў міжнароднай школе для маладых вучоных-археолагаў стала перайманне вопыту па навуковым супрацоўніцтве, а таксама па пошуку крыніц фінансавання даследчых праектаў і практычным выкарыстанні атрыманых вынікаў.
Станіслаў Юрэцкі, навуковы супрацоўнік Інстытута гісторыі НАН Беларусі,
старшыня Савета маладых вучоных Аддзялення гуманітарных навук і мастацтваў НАН Беларусі