З 23 па 27 красавіка 2018 года ў Нацыянальнай акадэміі навук Беларусі праходзіць міжнародная канферэнцыя па астрафізіцы, прысвечаная памяці Якава Барысавіча Зяльдовіча, ураджэнца Беларусі, заснавальніка расійскай школы рэлятывісцкай астрафізікі, стваральніка савецкай атамнай бомбы і распрацоўшчыка знакамітай “кацюшы”. Канферэнцыя сабрала вядучых вучоных з розных краін: Беларусі, Венгрыі, Германіі, Італіі, Кітая, Калумбіі, Польшчы, Расіі, Славеніі, Тайваня, Украіны, Харватыі і Эстоніі.

Арганізатарамі канферэнцыі выступілі Нацыянальная акадэмія навук Беларусі і міжнародныя арганізацыі “Сетка цэнтраў рэлятывісцкай астрафізікі” ICRANet, Цэнтральная еўрапейская ініцыятыва. Адметнай асаблівасцю канферэнцыі з’яўляецца тое, што ўпершыню ў Беларусі ў канферэнцыі ўдзельнічаюць такія міжнародныя калабарацыі як найбуйнейшая ў свеце абсерваторыя імя П’ера Ажэ (Pierre Auger, Аргенціна) для назірання касмічных прамянёў звышвысокіх энергій; абсерваторыя-комплекс чаранкоўскіх тэлескопаў H.E.S.S. (Намібія); касмічная абсерваторыя Радыеастрон (Расія); міжнародная сетка робатызаваных тэлескопаў Майстар (Расія); будучая касмічная місія Гама-400.

У рамках канферэнцыі быў падпісаны пратакол аб намерах паміж Нацыянальнай акадэміяй навук Беларусі і Інстытутам фізікі Расійскай акадэміі навук (ФІАН).

Канферэнцыя праходзіць у Беларусі ўжо ў трэці раз, што робіць нашу краіну цэнтрам прыцягнення для астрафізікаў з усяго свету.

Вэб-сайт коференцыі: http://www.icranet.org/zeldovich3