Мікалай Андрэевіч Кавалёў (н. 01.06.1937, в. Стары Дзедзін, Клімавіцкага р-на, Магілёўскай вобл.), вучоны ў галіне ветэрынарыі. Акадэмік Нацыянальнай акадэміі навук Беларусі (2003), акадэмік Акадэміі аграрных навук Рэспублікі Беларусь (1994-2002), доктар ветэрынарных навук (1977), прафесар (1979).

Навуковыя даследаванні прысвечаны эпізааталогіі патагенезу, распрацоўцы і ўдасканаленні сродкаў і спосабаў дыягностыкі, лячэнню і прафілактыцы інфекцыйных, галоўным чынам вірусных захворванняў жывёл. Вывучыў шэраг пытанняў эпізааталогіі патагенезу і распрацаваў прыжыццёвыя і пасмяротныя метады дыягностыкі, а таксама монавакцыны супраць шаленства, парагрыпу-3 (ПГ-3), інфекцыйнага рынатрахеіта (ИРТ) буйной рагатай жывёлы, ротавіруснай хваробы свіней, чумы платаядных, парвовирусного энтэрыту свіней, пастэрэлёзу коней, бівалентныя вакцыны супраць ПГ-3 і ІРТ; ІРТ і віруснай дыярэі буйной рагатай жывёлы; трансмісіўнага гастраэнтэрыту і ротавіруснай хваробы свіней; чумы і шаленства платаядных; полівалентныя вакцыны супраць пастэрэлёзу, калібактэрыёзу, адэнавіруснай і ротавіруснай хваробы цялятаў і парсючкоў; пастэрэлёзу, хламідозу і адэнавіруснай хваробы буйной рагатай жывёлы, сыраватачныя прэпараты супраць названых захворванняў. Распрацаваў больш за 35 біяпрэпаратаў і метадаў дыягностыкі і прафілактыкі інфекцыйных захворванняў жывёл.

Аўтар 360 навуковых прац, у т.л. 8 манаграфій, 19 вынаходстваў і патэнтаў.

Узнагароджаны ордэнам "Знак Пашаны" (1971), медалямі.

Асноўныя працы:

1. Новые методы диагностики зоонозных инфекций. Мн.: Ураджай, 1982 (в соавт.).
2. Профилактика инфекционных болезней животных. Мн.: Ураджай, 1988 (в соавт.).
3. Бешенство животных. Мн.: Ураджай, 1990 (в соавт.).