Нацыянальная акадэмія навук Беларусі

РУБАНІК Васіль Васільевіч

Васіль Васільевіч Рубанік (н. 09.05.1959, в. Бутава, Ушацкага раёна, Віцебскай вобласці), вучоны ў галіне тэхнічнай акустыкі. Член-карэспандэнт Нацыянальнай акадэміі навук Беларусі (2014), доктар тэхнічных навук(2005).

Навуковыя даследаванні і распрацоўкі ў галіне тэхнічнай акустыкі. Стварыў навуковую школу па тэрмапругкім фазавым ператварэнням пры высокаэнергетычных уздзеяннях. Эксперыментальна выявіў эфект ініцыявання памяці формы пад уздзеяннем ультрагукавых ваганняў у сплавах з эфектам памяці формы. Упершыню выявіў павелічэнне напружання цячэння ў такіх сплавах пры ўльтрагукавым уздзеянні ў інтэрвале тэмператур зваротнага мартэнсітнага ператварэння пры актыўнай ізатэрмічнай дэфармацыі ("анамальны эфект Блага-Лангенекера"). Распрацаваў і даследаваў новыя спосабы генерацыі рэактыўных механічных напружанняў і заданні эфекту памяці формы з дапамогай ультрагукавых ваганняў; вывучыў уплыў ультрагуку на працэсы тэрмаапрацоўкі пры хуткасным электракантактным нагрэве, механаактывацыі і прэсаванні парашкоў керамікі; распрацаваў і рэалізаваў у вытворчых умовах, а таксама ў практыцы навуковых даследаванняў новыя высокаэфектыўныя спосабы ўводу ўльтрагукавых ваганняў у ачаг дэфармацыі і абсталяванне для валачэння, прэсавання, зваркі палімерных матэрыялаў, эмульгіравання і інш.

Член 2-х спецыялізаваных саветаў па абароне кандыдацкіх і доктарскіх дысертацый, член рэдакцыйных калегій часопісаў «Фундаментальныя праблемы сучаснага матэрыялазнаўства» (Расійская Федэрацыя), «Вектар навукі ТГУ» (Расійская Федэрацыя), і «Веснік установы адукацыі «Віцебскі дзяржаўны тэхналагічны ўніверсітэт» (Рэспубліка Беларусь). Намеснік старшыні Міждзяржаўнага каардынацыйнага савета па фізіцы трываласці і пластычнасці матэрыялаў.

Аўтар больш за 500 навуковых прац, у т.л. 13 манаграфій і кніг, 55 вынаходак і патэнтаў.

Прэмія Нацыянальнай акадэміі навук Беларусі 2008 г. за цыкл работ па выкарыстанні магутных ультрагукавых ваганняў у навуковых даследаваннях і тэхналагічных працэсах.

Узнагароджаны медалём Францыска Скарыны (2014).

Асноўныя працы:

  1. Ультразвук и обработка материалов. Минск: Беларус. навука, 2003 (в соавт.).
  2. Ультразвук в технологии производства композиционных кабелей. Минск: Беларус. Навука, 2012 (в соавт.).
  3. Измерение микротвердости композита TiN - TiNi, полученного ионно-плазменным осаждением // Известия вузов. Черная металлургия. 2014. №4. С. 55–59 (в соавт.).
  4. Shape memory alloys: properties, technologies, opportunities- trans tech publications Ltd. Switzerland, 2015 (in co-aut. N.N. Resnina).
  5. Применение в хирургии материала с памятью формы из никелида титана. Медицинский журнал. 2016. № 1. С. 43–49 (в соавт.).