Нацыянальная акадэмія навук Беларусі

Дзямчук Міхаіл Іванавіч

Міхаіл Іванавіч Дзямчук (н. 28.05.1946, в. Дзявяткі, Кобрынскага р-на, Брэсцкай вобл.), вучоны ў галіне прыбора- і машынабудавання. Член-карэспандэнт Нацыянальнай акадэміі навук Беларусі (1986), доктар фізіка-матэматычных навук (1983), прафесар (1985). Заслужаны дзеяч навукі Рэспублікі Беларусь (1996).

Асноўныя працы ў галіне навуковага прыбора- і машынабудавання, сістэмнага аналізу і арганізацыйнага праектавання. Развіў новы навуковы напрамак у галіне эксперыментальнай і тэхнічнай фізікі, у аснове якога – распрацоўка арыгінальных метадаў і стварэнне на іх аснове прэцызійных оптаэлектронных сродкаў час-імпульснага аналізу інтэнсіўнасці светлавога выпраменьвання. Распрацаваў і стварыў на аснове тэхналогій новага пакалення лазеры ультракароткіх імпульсаў субпікасекунднага часовага дыяпазону з праграмуемымі параметрамі выпраменьвання. Кіраўнік шэрагу праектаў і праграм, нацэленых на фарміраванне ў Рэспубліцы высокаэфектыўнай сістэмы трансферу тэхналогій, арганізацыю эканамічных зон высокай інавацыйнай актыўнасці і навукова-вытворчых комплексаў і прадпрыемстваў высокай тэхналагічнай культуры. Аўтар шэрагу прац па праблемах будаўніцтва нацыянальнай сістэмы адукацыі, новых адукацыйных тэхналогій і навучальных устаноў інтэграванага тыпу, якія паслужылі асновай стварэння ў Рэспубліцы першых ліцэяў, гімназій, каледжаў, а таксама рэфармавання прафесійна-тэхнічнай і вышэйшай школы Рэспублікі.

Аўтар больш за 300 навуковых прац, у т.л. 3 манаграфій і 40 вынаходстваў.

Дзяржаўная прэмія БССР 1986 г. за распрацоўку і ўкараненне ў практыку оптыка-фізічных даследаванняў статыстычных метадаў часовага аналізу хуткапераменных патокаў светлавога выпраменьвання.

Асноўныя працы:

  1. Статистический одноквантовый метод в оптико-физическом эксперименте. Мн.: Изд-во БГУ, 1981 (совм. с М.А.Ивановым).
  2. Импульсная спектрометрия. Мн.: Университетское, 1986 (совм. с М.А.Ивановым).
  3. Республика Беларусь: системные принципы устойчивого развития. Мн.: РИВШ БГУ, 2003 (совм с. А.Т.Юркевичем).
  4. Высшая школа в стратегии инновационного развития Республики Беларусь. Мн.: РИВШ, 2006.
  5. Системная методология инновационной деятельности: учеб. пособие. Минск: РИВШ, 2007 (совм с. А.Т.Юркевичем).