Пётр Паўлавіч Матус (н. 24.07.1953, г.п. Рось, Ваўкавыскага раёна, Гродзенскай вобласці) – вучоны ў галіне вылічальнай матэматыкі. Член-карэспандэнт (2017), доктар фізіка-матэматычных навук (1995), прафесар (1996).
Навуковыя даследаванні па вылічальнай матэматыцы і матэматычнаму мадэляванню. Выканаў асноватворныя працы ў галіне пабудовы і даследаванні вылічальных метадаў адаптыўнага тыпу і дакладных рознасных схем, якія дазваляюць істотна скараціць машынны час пры мадэляванні прыкладных задач на ЭВМ. Аўтар піянерскіх работ па каэфіцыентнай і нелінейнай устойлівасці рашэнняў дыферэнцыяльна-аператарных ураўнанняў і аператарна-рознасных схем. На аснове прапанаваных і вывучаных вылічальных метадаў распрацаваў комплексы праграм і правёў прамое мадэляванне многіх прыкладных задач фізікі і тэхнікі, у тым ліку па задачах лазернай тэхналогіі і гідраэкалагічных праблемах; мадэляванні працэсаў цепламасапераносу ў працэсах нафтаперапрацоўкі; мадэляванні цеплавых рэжымаў касмічных апаратаў.
Аўтар больш за 250 навуковых прац, у тым ліку 3 манаграфій.