Нацыянальная акадэмія навук Беларусі

ПРУШАК Віктар Якаўлевіч

Віктар Якаўлевіч Прушак (н. 24.01.1956, в. Ямінск, Любанскага р–на, Мінскай вобл.) – вучоны ў галіне геатэхналогіі і горнага машынабудавання. Член-карэспандэнт (2014), доктар тэхнічных навук (2000), прафесар (2001). Заслужаны вынаходнік Рэспублікі Беларусь (2012). Ганаровы грамадзянін г. Любань (2006).

Распрацаваў рэсурсазберагальныя тэхналогіі падземнай распрацоўкі саляных пластоў у складаных горна-геалагічных умовах, спосабы прадухілення газадынамічных з'яў у калійных рудніках, спосабы павышэння ўстойлівасці горных выпрацовак. Устанавіў заканамернасці праявы горнага ціску ў пародным масіве паблізу горных выпрацовак Старобінскага радовішча, Асаблівасці ўзаемадзеяння інжынерных канструкцый з пародным масівам на глыбокіх гарызонтах, асаблівасці зруху зямной паверхні ва ўмовах развіцця слупковых сістэм распрацоўкі. Распрацаваў геафізічныя мадэлі ўзаемадзеяння выканаўчых органаў горных машын з напружана-дэфармаваным горным масівам, вызначыў заканамернасці пабудовы забойных лавакомплексаў, механізмы ўплыву горнага ціску на праходчыя і ачышчальныя комплексы. Прапанаваў рашэнні па аптымізацыі тэхналогіі перапрацоўкі хлорыстага калію.

Аўтар больш за 290 навуковых прац, у тым ліку 12 манаграфій, 166 патэнтаў на вынаходствы.

Дзяржаўная прэмія Рэспублікі Беларусь (2000) за працу "Распрацоўка і асваенне вытворчасці пад'ёмна-транспартнага абсталявання для горназдабыўной прамысловасці Рэспублікі Беларусь».

Узнагароджаны медалём "За працоўныя заслугі» (2006).

Асноўныя працы:

  1. Строительство горных выработок специальными способами. Минск, 2005 (в соавт.).
  2. Технология производства и ремонта горных машин и оборудования : в 2 т. Минск, 2007 (в соавт.).
  3. Регулирование коллоидно-химических свойств солевых минеральных дисперсий при получении гранулированных калийных удобрений Минск, 2010 (в соавт.).
  4. Деформирование контура горных выработок Старобинского месторождения калийных солей при различных глубинах заложения // Докл. НАН Беларуси. 2016. № 2.