Уладзімір Макаравіч Шкуматаў (н. 30.05.1952, в. Брацкае, Нараўлянскага р-на, Гомельскай вобл.) – вучоны ў галіне біяарганічнай хіміі. Член-карэспандэнт (2014), доктар біялагічных навук (1991), прафесар (2008).
Працы ў галіне біятэхналогіі, фізіка-хімічнай біялогіі, біяхіміі. На аснове з'явы "малекулярнага пазнавання" стварыў і ўжыў ферментатыўныя мікрарэактары для біятэхналагічнага атрымання актыўна пазначаных стэроідаў. Прапанаваў эксперыментальна-тэарэтычную мадэль на аснове рэкамбінантных мікраарганізмаў і метадаў біяінфарматыкі для ацэнкі прамога і пабочных дзеянняў лекавых злучэнняў. Устанавіў новы тып актыўнасці рэкамбінантных бактэрый, што з'яўляецца прынцыпова важным для стварэння спосабаў прадухілення развіцця паталагічных станаў з удзелам халестэрыну. Абгрунтаваў малекулярныя механізмы ўздзеяння імпульснага ультрагуку на малекулы-папярэднікі і актыўныя формы шэрагу ферментаў пры распрацоўцы новага акуста-ферментатыўнага метаду лячэння тромбаэмбалічных станаў. Стварыў кампазіцыі ферментных ачышчальнікаў "Крышталін-Ф" (сумесна з прадпрыемствам "ХімМедСінтэз"), сканструяваў новыя лініі рэкамбінантных мікраарганізмаў для біятэхналагічнага атрымання стэроідаў.
Аўтар больш за 260 навуковых прац, у тым ліку 7 Калектыўных манаграфій, 12 аўтарскіх пасведчанняў і патэнтаў.
Прэмія АН СССР і АН ГДР (1988) за лепшую навуковую працу "Ферментатыўныя ператварэнні ліпоідных рэчываў (стэроідаў). Выкарыстанне прынцыпаў монааксігеназнага каталізу для стварэння біятэхналагічных шляхоў атрымання фізіялагічна актыўных стэроідаў».