Члены-карэспандэнты :: ШУШКЕВІЧ Станіслаў Станіслававіч

Станіслаў Станіслававіч Шушкевіч (н. 15.12.1934, Мінск), вучоны ў галіне радыёфізікі, дзяржаўны і грамадскі дзеяч. Член-карэспандэнт Нацыянальнай акадэміі навук Беларусі (1991), доктар фізіка-матэматычных навук (1970), прафесар (1973). Заслужаны дзеяч навукі і тэхнікі БССР (1982).

— Скончыў Белдзяржуніверсітэт (1956).
— У 1956 – 1960 гг. малодшы навуковы супрацоўнік Інстытута фізікі АН БССР.
— У 1960 – 1961 гг. старэйшы інжынер на Мінскім радыёзаводзе.
— У 1961 – 1967 гг. у Белдзяржуніверсітэце: старэйшы інжынер, галоўны інжынер лабараторыі, загадчык сектарам.
— У 1967 – 1969 гг. прарэктар па навуковай рабоце Мінскага радыётэхнічнага інстытута.
— У 1969 – 1990 гг. у Белдзяржуніверсітэце: дацэнт, прафесар, загадчык кафедры, прарэктар па навуковай рабоце.
— У 1989 – 1991 гг. дэпутат Вярхоўнага Савета СССР.
— У 1990 – 1996 гг. дэпутат Вярхоўнага Савета Рэспублікі Беларусь.
— У 1990 – 1991 гг. першы намеснік старшыні Вярхоўнага Савета БССР.
— У 1991 – 1994 гг. Старшыня Вярхоўнага Савета Рэспублікі Беларусь.

Навуковыя працы ў галіне радыёфізікі. Адзін з аўтараў асноватворных работ па аднаэлектроннай фотарэгістрацыі. Ім развіты метады электроннай інтраскапіі, спосабы візуалізацыі і каардыянатаадчувальныя цвёрдацельныя дэтэктары іанізуючых выпраменьванняў. Пад яго кіраўніцтвам выкананы комплекс даследаванняў па забеспячэнні вытворчасці звышвялікіх інтэгральных схем, шырока ўкаранёны радыёспектраметрычны кантроль матэрыялаў электроннай тэхнікі, створаны новы клас прыбораў – малагабарытныя радыёспектраметры агульнага і спецыяльнага прызначэння.

Аўтар больш за 150 навуковых прац, у т.л. 3 манаграфій і падручніка, 72 вынаходстваў.

Прэмія Савета Міністраў СССР 1985 г. Дзяржаўная прэмія БССР 1988 г. за падручнік для вышэйшых навучальных устаноў "Асновы радыёэлектронікі".

Асноўныя працы:

Аппаратура для исследования электронного парамагнитного резонанса. Л.: Энергия, 1968 (совм. Р.С. Мароном, А.Л. Позняком).
Техника электронного парамагнитного резонанса. Л., 1980.
Основы радиоэлектроники : учеб. для студентов физ. спец. ун-тов. 2-е изд., перераб. и доп. Минск: Университетское, 1986 (совм. с М.К. Ефимчиком).
ЭВМ и микропроцессор. Минск: Нар. асвета, 1990 (совм. с Е.В. Бильдюкевичем, В.Л. Гурачевским).