Віктар Паўлавіч Грыбкоўскі (30.04.1932, в. Асташкавічы, Дубровенскага р-на, Віцебскай вобл. – 26.10.2000), фізік. Член-карэспандэнт Нацыянальнай акадэміі навук Беларусі (1977), доктар фізіка-матэматычных навук (1973), прафесар (1979).

Даследаванні па праблемах нелінейнай оптыкі, лазернай фізікі, люмінесцэнцыі, фізікі стрымерных разрадаў у паўправадніках. Развіў тэорыю паглынання святла і люмінесцэнцыі пры інтэнсіўным узбуджэнні, увёў паняцце параметра нелінейнасці, вызначыў асноўныя заканамернасці эфектаў насычэння ў паўправадніках. Атрымаў агульныя формулы для парога, магутнасці, ККД, частоты пульсацый і аптымальнага рэжыму генерацыі паўправадніковых лазераў.

Аўтар больш за 300 навуковых прац, у тым ліку 5 манаграфій, дзве з якіх перавыдадзеныя за мяжой.

Дзяржаўная прэмія БССР 1976 г. за цыкл прац па распрацоўцы метадаў разліку энергетычных і часовых характарыстык цвёрдацельных аптычных квантавых генератараў, апублікаваных у 1961 – 1975 гг.

Узнагароджаны ордэнам "Знак Пашаны" (1981), медалямі.

Асноўныя працы:

1. Введение в теорию люминесценции. Мн.: Из-во АН БССР, 1963 (совм. с Б.И. Степановым).
2. Теория поглощения и испускания света в полупроводниках. Мн.: Наука и техника, 1975.
3. Полупроводниковые лазеры. Мн.: Университетское, 1988.