Памяці вучонага :: НЯФЁД Уладзімір Іванавіч

Уладзімір Іванавіч Няфёд (27.01.1916, г. Шахты, Растоўскай вобл., Расія – 23.04.1999), тэатразнаўца, драматург. Член-карэспандэнт Нацыянальнай акадэміі навук Беларусі (1972), доктар мастацтвазнаўства (1963). Прафесар (1964). Заслужаны дзеяч мастацтваў БССР (1975).

— Скончыў Маскоўскі інстытут гісторыі, філасофіі і літаратуры (1940).
— У 1940 – 1941 гг. намеснік начальніка, у 1942 – 1947 гг. начальнік аддзела тэатраў Упраўлення па справах мастацтваў пры Савеце Міністраў БССР.
— З 1951 г. у АН БССР загадчык сектара: з 1954 г. мастацтва Інстытута літаратуры і мастацтва, у 1957 – 1970 гг. тэатра і кіно, у 1970 – 1977 гг. зводу помнікаў гісторыі і культуры Беларусі, у 1977 – 1988 гг. загадчык аддзела Тэатра Інстытута мастацтвазнаўства, этнаграфіі і фальклору АН БССР, з 1988 г. галоўны навуковы супрацоўнік гэтага інстытута.
— Адначасова ў 1947 – 1990 гг.прафесар Беларускага тэатральна-мастацкага інстытута.

Даследаваў пытанні гісторыі, тэорыі і сучаснай практыкі беларускага тэатра, праблемы драматургіі і творчасці майстроў сцэны (кнігі "Тэатр у вогненныя гады", 1959 г.; "Сучасны беларускі тэатр", 1961 г.; "Станаўленне беларускага савецкага тэатра", 1965 г.; Дзяржаўная прэмія БССР 1966 г.). Адзін з аўтараў "Гісторыі савецкага драматычнага тэатра" (т. 1-6, 1966 – 1971), галоўны рэдактар і аўтар асобных раздзелаў "Гісторыі беларускага тэатра" (т. 1-3, 1983-1987). Аўтар аднаактовых п'ес.

Апублікаваў каля 500 навуковых прац, артыкулаў і рэцэнзій, у тым ліку 13 манаграфій.

Узнагароджаны ордэнам "Знак Пашаны" (1944), медалямі.

Асноўныя працы:

Беларускi Акадэмiчны тэатр iмя Янкi Купалы. Мн., 1970.
Беларускi тэатр iмя Якуба Коласа. Мн., 1976.
Гiсторыя беларускага тэатра. Мн., 1982.
Iгнат Буйнiцкi - бацька беларускага тэатра. Мн., 1991.
Францiшак Аляхновiч: Тэатральная i грамадска-палiтычная дзейнасць. Мн., 1996.