Рымскі Генадзь Васільевіч (19.09.1936, г. Валгаград – 23.8.2000), вучоны ў галіне тэхнічнай кібернетыкі, паэт. Член-карэспандэнт Нацыянальнай акадэміі навук Беларусі (1996), доктар тэхнічных навук (1981), прафесар (1981).

Навуковыя даследаванні ў галіне тэхнічнай кібернетыкі. Прапанаваў агульную тэорыю каранёвых траекторый сістэм аўтаматычнага кіравання( САУ), метады і сродкі аўтаматызацыі іх праектавання. Распрацаваў матэматычны апарат пабудовы і пераўтварэнні каранёвых гадографаў сістэм, параметры якіх змяняюцца ў адвольных межах па зададзеных законах. Прапанаваў новы клас дакладных (каранёвых) метадаў даследавання ўстойлівасці і якасці нелінейных САУ. Распрацаваў асновы пабудовы інтэлектуальных комплексаў аўтаматызаванага праектавання, якія адрозніваюцца калектыўнай працай карыстальнікаў, гнуткімі тэхналогіямі праектавання, інтэлектуальнымі рашальнікамі задач.

Аўтар больш за 330 навуковых прац, у тым ліку 7 манаграфій, 30 вынаходстваў, прамысловага ўзору.

Прэмія НАН Беларусі 1995 г. за цыкл манаграфій па агульнай тэорыі каранёвых траекторый сістэм кіравання і аўтаматызацыі іх праектавання.

Узнагароджаны медалём.

Асноўныя працы:

1. Основы общей теории корневых траекторий систем автоматического управления. Мн., 1972.
2. Автоматизация анализа динамических систем на основе общей теории корневых траекторий. Мн., 1973.
3. Автоматизация исследований динамических систем. Мн., 1978 (совм. с В.В.Таборовцом).
4. Теория систем автоматизированного проектирования: Интеллектуальные САПР на базе вычислительных комплексов и сетей. Мн., 1994.