Памяці вучонага :: ВЫСОЦКІ Міхаіл Сцяпанавіч

— Працоўную дзейнасць пачаў у 1946 г. на Мінскім аўтамабільным заводзе слесарам-зборшчыкам, пасля заканчэння ў 1949 г. Мінскага аўтамеханічнага тэхнікума – канструктар, старшы канструктар, вядучы канструктар, адначасова навучаючыся ва Ўсесаюзным завочным машынабудаўнічым інстытуце ў Маскве, які скончыў у 1955 г.
— У 1958 – 1960 гг. начальнік СКБ-3, у 1960 – 1961 гг. намеснік галоўнага канструктара, у 1961 – 1996 гг. галоўны канструктар Мінскага аўтамабільнага завода, адначасова ў 1975 – 1996 гг. галоўны канструктар – начальнік упраўлення галоўнага канструктара вытворчага аб'яднання "БелаўтаМАЗ" , з 1975 г. загадчык кафедры Беларускага політэхнічнага інстытута.
— У 1992 – 1997 гг. віцэ-прэзідэнт Акадэміі навук Беларусі, у 1993 – 2001 гг. дырэктар Навуковага цэнтра праблем механікі машын Нацыянальнай акадэміі навук Беларусі, з 2001 г. генеральны дырэктар Навукова-інжынернага рэспубліканскага ўнітарнага прадпрыемства "Белаўтатрактарабудаванне" Нацыянальнай акадэміі навук Беларусі, адначасова з 2002 г. генеральны канструктар па аўтамабільнай тэхніцы Рэспублікі Беларусь.
— З 2003 г. ганаровы дырэктар Інстытута механікі і надзейнасці машын Нацыянальнай акадэміі навук Беларусі, у 2006 – 2012 гг. генеральны дырэктар, з 2012 г. намеснік дырэктара па навуковай рабоце Аб'яднанага інстытута машынабудавання Нацыянальнай акадэміі навук Беларусі.

Пад яго кіраўніцтвам і пры яго асабістым удзеле створаны першыя беларускія аўтамабілі з мінскай маркай. Больш за паўстагоддзя ўзначальваў ў рэспубліцы распрацоўкі прагрэсіўнай аўтамабільнай тэхнікі. Распрацаваныя пры яго асабістым удзеле канструкцыі прычэпаў і паўпрычэпаў у сярэдзіне 1950-х гадоў з шэрагам унікальных навін (тарсіённая падвеска, герметычныя тармазы і апараты да іх) былі выкарыстаныя як шасі для мантажу перасоўных электрастанцый і сістэм кіравання для запуску першага штучнага спадарожніка Зямлі. За гэты час пад яго кіраўніцтвам створана шэсць пакаленняў аўтамабільнай тэхнікі грузападымальнасцю ад 8 да 240 тон (больш за 300 мадэляў), большасць якіх серыйна выпускаюцца аўтамабільнымі заводамі, модульная канструкцыя аўтацягніка МАЗ-2000, запатэнтаванага ў пяці вядучых краінах і які не мае аналагаў у сусветным аўтамабілебудаванні. Адзін з ініцыятараў арганізацыі ў рэспубліцы ўласнай буйнамаштабнай вытворчасці першых мадэляў аўтобусаў Мінскага аўтазавода. Навуковыя даследаванні ў галіне тэорыі і канструявання мабільных машын. Распрацаваны метадалогія сінтэзу аптымальных маса-геаметрычных параметраў, аптымізацыі магутнасці, цягава-хуткасных уласцівасцяў і паліўнай эканамічнасці вялікагрузных магістральных аўтацягнікоў на аснове імітацыйнага мадэлявання іх руху з улікам характарыстык тыпавых дарожных умоў, канцэпцыя стварэння і метадалогія даследавання перспектыўных мабільных транспартных машын на аснове сістэмнага падыходу.

Аўтар больш за 450 навуковых прац, у т.л. 19 манаграфій, 145 аўтарскіх пасведчанняў і патэнтаў.

Дзяржаўная прэмія СССР 1970 г. за стварэнне канструкцыі ўніфікаванага сямейства высокапрадукцыйных вялікагрузных аўтамабіляў, аўтацягнікоў і аўтасамаскідаў. Дзяржаўная прэмія БССР 1986 г. за распрацоўку і ўкараненне гнуткай аўтаматызаванай сістэмы паскораных выпрабаванняў машын, якія выпускаюцца.

Узнагароджаны ордэнамі Леніна (1974), Працоўнага Чырвонага Сцяга (1968), Айчыны III ступені (1998), Айчыны II ступені (2004).

Асноўныя працы:

Основы проектирования автомобилей и автопоездов большой грузоподъемности. Мн.: Наука и техника, 1980.
Грузовые автомобили: Проектирование и основы конструирования. 2 изд. М.: Машиностроение, 1995 (совм. с Л.Х.Гилелесом, С.Г.Херсонским).
Мобильные транспортные машины. Мн.: Беларуская навука, 1998 (совм. с В.В.Ванцевичем, Л.Х.Гилелесом).
Аэродинамика колесного транспорта. Мн.: НИРУП "Белавтотракторостроение", 2001 (совм. с А.Н.Евграфовым).
Активная безопасность автомобиля. Основы теории. Мн.: НИРУП "Белавтотракторостроение", 2002 (в соавт.).
Динамика автомобильных и железнодорожных цистерн. Мн.: НИРУП "Белавтотракторостроение", 2006 (совм. с Ю.М.Плескачевским, А.О.Шимановским).
Основы проектирования модульных магистральных автопоездов. Мн.: Беларуская навука, 2011 (совм. с С.И.Кочетовым, С.В.Харитончиком).