500-годдзю беларускага кнігадрукавання прысвячаўся Навукова-культурны форум у мінскім Палацы мастацтваў. Хоць цікавасць да Францішка Скарыны вялікая, аднак у біяграфіі застаюцца белыя плямы. У сёлетні Год навукі добра было б спалучыць культуру і навуку, паглыбіцца ў невядомыя старонкі ў жыцці, дзейнасці беларускага мысляра, генія беларускай нацыі — так назваў яго ў сваім дакладзе акадэмік НАН Беларусі, доктар гістарычных навук Міхаіл Касцюк. Нельга сказаць, што гэта не рабілася й раней. А новыя даследаванні біяграфіі Скарыны прадставіў на імпрэзе кандыдат гістарычных навук Алесь Жлутка, старшы навуковы супрацоўнік Інстытута гісторыі НАН Беларусі.

У Цэнтральнай навуковай бібліятэцы імя Якуба Коласа НАН Беларусі прэзентаваліся адразу два выданні: “Янка Маўр. Выбранае” і кніга ўспамінаў дачкі пісьменніка Наталлі Міцкевіч “Доўгая дарога ад дома Янкі Маўра да дома Якуба Коласа”.

Адметную выставу да 100-х угодкаў з часу вянчання Янкі Купалы і Уладзіславы Станкевіч наладзілі ў Дзяржаўным літаратурным музеі Янкі Купалы. Дарэчы, у праекце ўдзельнічаюць яшчэ Дзяржаўны літаратурна-мемарыяльны музей Якуба Коласа, Цэнтральная навуковая бібліятэка імя Якуба Коласа НАН Беларусі, Беларускі дзяржаўны архіў-музей літаратуры і мастацтва, Дзяржаўны музей гісторыі беларускай літаратуры, а таксама нашчадкі творцаў.

У Інстытуце культуры Беларусі абмяркоўвалі, як наладзіць вытворчасць слуцкіх паясоў.

Юзаф Крашэўскі, самы пладавіты пісьменнік і “чалавек-універсітэт”, меў родавыя карані на беларускай зямлі. З нагоды 200-х угодкаў польскага пісьменніка ў Цэнтральнай навуковай бібліятэцы імя Якуба Коласа Нацыянальнай акадэміі навук Беларусі прэзентавана выстава “Юзаф Крашэўскі ў люстэрку гісторыі”. Зладзіў выставу аддзел рэдкіх кніг і рукапісаў бібліятэкі сумесна з Польскім Інстытутам у Мінску.

Напярэдадні святкавання 20-годдзя ўстанаўлення дыпламатычных адносінаў паміж Рэспублікай Беларусь і Рэспублікай Турцыя ў Мінску прайшла прэзентацыя зборніка “Сацыяльна-філасофскія аспекты вучэння Ф. Гюлена: погляд беларускіх вучоных”.